緊急召喚

妹妹，我諗住去機場接你機，但金田豬發現你俾我的資料唔多似係你到達香港的時間喎！
佢話接機邊有分 Terminal 幾，我諗諗下又係喎！
你係咪俾左你上機的資料俾我？？
咁究竟我應該幾點接機呀？查實你係香港時間邊日到步？你盡快 confirm 我丫~~

委以重任

當媽媽知道妹妹你下晝機番香港，即係趕得切番屋企食晚飯，佢立即對你姐姐我委以重任。
皆因媽媽要準備「九大鬼」俾妹妹你食，佢聲稱「我要煮飯，邊得閒去接機！大牛你去啦一於！」
就係咁，姐姐我臨危受命，硬著頭皮闖入日日都有 H1N1 患者途經嘅高危地區，嗱，姐姐我真係搵命搏，你到時見到我個樣真係要感動啲。
期待 28 號見！

21

話說尋晚講開年齡問題，有人問起爸爸你幾多歲，爸爸話廿一呱，引來媽媽激烈糾正及大家哄笑，爸爸自己亦都傻笑。
口痕友小豬就話：「外父可能覺得：我咁後生，個女廿一歲差唔多啦」，爸爸繼續傻笑。
哈哈，咪就係從來唔知啲女幾大讀幾年級嘅爸爸囉......

我的快樂生日

好開心呀，妹妹身在遠方都記得我牛一~~
今年我好威呀，20/5舊曆生日，21/5新曆生日。
尋日舊曆生日就同咗爸爸媽媽老爺奶奶去好彩食晚飯。
今晚21/5我同小豬撐檯腳去据扒。
尋晚我地食飯決定咗等你番黎請你食番餐「傑」嘅，哈哈哈~~
不過同時我地又決定咗你第一個月出糧要請番我地食大餐！
28/5糭節喎，咁爸爸媽媽一定要去接機喇。
尋晚我同媽媽講其實有行李車載行李佢地去巴士站接你就得，佢登時面有難色，哈哈，跟住奶奶打圓場話唔緊要啦，爸爸媽媽心急要見囡囡，媽媽即刻和議，仲話要煲雞粥俾你食，好搞笑。
盡情玩得開心啲啦，等你返黎同我地講你嘅所見所聞！
仲有，等你番黎同我補祝生日、互換手信、玩新Wii Game、唱k......嘻嘻。

歡迎歡迎，熱烈歡迎~

雖然我明白對於一個外遊接近個半月，而行程又即將進入最後一星期倒數的「遊子」來講，問佢幾時番屋企係好殘忍嘅事......
但係，基於受可愛媽媽所託，唔問又唔得。
有晚姐姐與媽媽閒談中....
媽媽：「係呢，燕姐姐幾時返？」
姐姐：「好似28號呱，佢冇講低？」
媽媽：「好似夜晚9點幾機呀，唔知幾多號呢，我寫咗喺日曆度。」
(姐姐心諗：咁咪得囉，你寫得落去即係妹妹話俾你聽啦，唔通仲有錯咩...)
媽媽：「等我陣間睇下日曆先，我同亞爸去接機嘛。」
姐姐：「接機咁溫馨？」
媽媽：「呢！(理所當然狀) 佢咁多行李一個人點拎？」
(姐姐心諗：咁有行李車嘛，去巴士站接咪得囉。)
姐姐：「咁我上網再問下妹妹邊日邊班機啦。」
媽媽：「好呀！不過我都寫咗喺日曆度......」
(啤~~~~一聲。)

Over Over

妹妹，妹妹，你而家喺邊呀？你好嗎嗎嗎嗎嗎嗎...(千里傳音)

就在夏天的黃昏

妹妹竟然有鍾意食同訓形同豬一樣生活0既一天，世事真係無奇不有。
我諗媽媽知道你食咁多嘢一定開心到飛起！
今個星期五我同小豬會同爸爸媽媽、老爺奶奶一齊預祝母親節。
至於去邊度食相信唔駛我多講都知啦...(油麻地好彩，哈哈)
0係上燒鵝之前我會代你當眾ork啖佢。
去台灣前0個個星期日俾媽媽拉左番駿景園執嘢，我好叻呀，十九幾箱嘢我一個人一個下晝執哂，仲幫你「捍衛」咗好多正嘢，唔係一定俾媽媽掉哂。
而家我屋企「九反」咁亂，再加上去完兩次旅行又買咗d新嘢番黎，今次真係嫌間屋細。
話時話俾我0係台灣買到金田七第十二期喎，今次真係儲齊成套金田七喇，好開心。
得閒我哋應該重頭睇一次，回味一下。
仲有得閒你應該update下d House啦，season 5仲有一集就播完喇，你，係咪仲停留0係season 2？真係落後到冇朋友。
不過講咁多都係廢話，而家最緊要係你玩得開心。
好好享受呢個悠長假期啦，肯定你呢世都唔會忘記今次0既旅程。
至於你話想同埋一家人去多次體驗下，哈哈，我同小豬就ok呀，爸爸都應該會「死頂」(雖則佢覺得冇白米飯食唔習慣)，但係媽媽你可能要搵八人大轎先請得佢郁(或者乾脆搵抬轎0個八個大隻佬捉佢上飛機)，哈哈。
醫生醫生，媽媽呢d係咪叫做「旅行恐慌症」，英文名叫做「累幸phobic」呀？

台灣歸來

Hello 妹妹！妹妹而家應該開始歐洲流浪喇，唔知你而家去咗邊度呢？
五一假期我同小豬去咗台灣四日，食到肚滿腸肥！不過一到步就聽到新聞話香港有一個豬流感確診個案，我同小豬幾驚俾人歧視，哈哈。
媽媽都有同我講佢六點鐘就打俾你，你知媽媽架啦，佢邊有好科學咁計下幾點打俾你最好，都係靠佢「大概」觀感。
佢話想打俾你，我問佢咁幾點打好，佢又「依依哦哦」回憶緊你上次打俾佢係幾點，你嗰邊就係早上……總之極不科學啦。
之後佢同我講佢最後打俾你你竟然係六點鐘你訓到「朦朦鬆鬆」，真係笑死我。
嗱，鴨舌等你唔到喇，鳳梨酥就等你啦！
Miss you ah!!

p.s. 頂！「天使與魔鬼」5.15 上映，我仲未睇本書，呢次終於明白同電影上畫日期競賽的感受，一直以來，真係辛苦哂你！